Pak ditë pasi VNA raportoi se Vilma Premti pritej të zëvendësonte Vali Bizhgën si shefe kabineti e kryeministrit Edi Rama, zhvillimet kanë marrë një tjetër drejtim. Në mbledhjen e sotme të qeverisë, Premti është emëruar zëvendësministre për Evropën dhe Punët e Jashtme.
Nuk dihen ende arsyet e ndryshimit të beftë, ndërsa përflitet për një refuzim që Edi Rama i bëri propozimit të Vali Bizhgës për t’i lënë Vilma Premtin në pozicionin e shefes së kabinetit.
Megjithatë Premti nuk ka ngelur pa post duke iu bashkuar sërish shefes të saj të dikurshme, Elisa Spiropali, tashmë në postin e zëvendësministres për Evropën dhe Punët e Jashtme. Kujtojmë që më herët Vilma Premti ishte shefe kabineti e Elisa Spiropalit. Më pas shërbeu si shefe kabineti e Holta Zaçajt, kryetares së Gjykatës Kushtetuese.
Ndërkohë, Vali Bizhga vijon të mbajë pozicionin e saj si drejtoreshë kabineti e kryeministrit, pavarësisht thashethemeve për një dorëheqje të mundshme që qarkulluan disa javë më parë. Bizhga është një ndër bashkëpunëtoret më të afërta të Ramës, me një karrierë të gjatë në administratë që nga koha kur ai drejtonte Bashkinë e Tiranës. E njohur për profilin e saj të ulët publik, ajo cilësohet si një nga figurat kyçe të stafit të tij të ngushtë.
