Në një zhvillim të rrallë politik në Kuvend, mazhoranca dhe opozita kanë votuar unanimisht projekt-rezolutën për procesin e integrimit evropian të Shqipërisë.
Në një moment kur marrëdhëniet mes PS dhe PD mbeten të tensionuara, në sallën e Parlamentit është arritur konsensus i gjerë për këtë dokument, duke shënuar një nga rastet e pakta të bashkëpunimit të përbashkët.
Në seancë ishin të pranishëm 115 deputetë, ndërsa votimi i rezolutës rezultoi me 114 vota pro dhe 1 abstenim.
Rezoluta parashikon angazhim të koordinuar dhe gjithëpërfshirës për përshpejtimin e procesit të anëtarësimit të vendit në Bashkimin Evropian.
Ajo thekson gjithashtu rëndësinë e dialogut politik dhe shoqëror, me synim ndërtimin e një konsensusi kombëtar mbi prioritetet europiane të Shqipërisë.
