Presidenti amerikan Donald Trump ka nominuar si ambasador të SHBA-së në Shqipëri Eric Wendt, një ushtarak në pension.
Gjeneral Eric Wendt ka lindur më 7 tetor 1964 në Berkeley, Kaliforni. Gjatë karrierës së tij ai ka komanduar në të gjitha nivelet e Forcave Speciale dhe Operacioneve Speciale, nga kapiten deri në gjenerallejtënant. Wendt shërbeu për katër vite e gjysmë në Këmbësorinë e Lehtë dhe për 30 vite në Forcat Speciale, duke mbajtur për 13 vite role komanduese në nivele taktike, operacionale dhe strategjike, ndërsa ka shërbyer në 56 vende të ndryshme.
Gjatë karrierës së tij ushtarake, Wendt ka qenë Ndihmës Kryesor Ushtarak i Sekretarëve të Mbrojtjes Robert Gates dhe Leon Panetta. Ai ka punuar gjithashtu drejtpërdrejt me Sekretarin e Shtetit të SHBA-së dhe ka drejtuar për dy vite një koalicion prej tetë vendesh, ndërsa shërbente si Koordinator i Sigurisë së SHBA-së për Izraelin dhe Autoritetin Palestinez.
Në detyrën e tij të fundit, Wendt komandoi Shtabin e Operacioneve Speciale të NATO-s nga viti 2019 deri në vitin 2021. Ai u tërhoq nga shërbimi ushtarak më 1 mars 2021, pas 34 vitesh e gjysmë karrierë.
