Kryeministri Edi Rama ka reaguar ashpër ndaj deklaratës së Shoqatës së Gjyqtarëve lidhur me çështjen e pagave. Në një komunikim të drejtpërdrejtë në rrjetet sociale, Rama e cilësoi gjuhën e përdorur nga shoqata si të papranueshme dhe akuzoi gjyqtarët se po përpiqen t’i imponohen Parlamentit dhe qeverisë përmes vendimeve gjyqësore.
Sipas kreut të qeverisë, shqetësimi i tij është ngritur publikisht si palë në një proces gjyqësor, në mbrojtje të interesit publik. Rama tha se Shoqata e Gjyqtarëve po sillet si një parti politike dhe jo si një institucion që duhet të ruajë paanshmërinë e pushtetit gjyqësor.
“Jam i surprizuar nga një reagim i pabesueshëm i Shoqatës së Gjyqtarëve. Është e pajustifikueshme dhe e papranueshme përpjekja për t’i imponuar Parlamentit dhe qeverisë rritjen e pagave përmes gjykatave,” u shpreh Rama.
Ai theksoi se aktualisht pagat e gjyqtarëve në Shqipëri janë të barabarta me ato në Greqi, ndërsa kërkesat për rritje i cilësoi të tepruara.
“Sot që flasim, ju i keni pagat sa në Greqi dhe kërkoni t’i rrisni me 2–3 mijë euro në muaj. Në emër të çfarë? Në emër të ligjit dhe Kushtetutës? Kjo është e pavërtetë,” deklaroi kryeministri.
S’mund të thuash topi është i imi, topin do ta gjuaj vetë dhe porta duhet të jetë bosh.Tymnajë populiste. Regjistrohuni si parti dhe shpalosni platformën tuaj nëse doni.Ju zotërinj kërkoni 37 mln euro nga buxheti i shtetit. Kjo është e vërteta dhe se luan topi. Se për çfarë jemi ne në Gjykatën Kushtetuese me ju, ta dinë shqiptarët. Ju kërkoni që për gjyqtarin e Apelit, nga 3480 euro, të shkojë në mbi 5 mijë. Për SPAK e veçoj, se nuk i është bashkuar kësaj kërkese absurde, për ta çuar pagën 9800 euro. Ndërkohë, sot aktualisht, pagat e gjyqtarëve, janë rreth 6500 euro. Ju doni t’i rrisni pagat në muaj 3 mijë euro vetes, në gjykata. Ku jeni ju? Ça kërkoni?
