Në seancën parlamentare të sotme, mes tensioneve dhe debateve për ndryshimet në qeveri, një episod i pazakontë u regjistrua gjatë votimit për shkarkimin e Elisa Spiropalit nga posti i ministres së Jashtme.
Në tabelën elektronike të votimit rezultoi se dy deputetë të opozitës, Jozefina Topalli dhe Sali Berisha, kishin votuar kundër shkarkimit të saj, një rezultat që menjëherë ngjalli habi në sallë.
Situata u bë edhe më e paqartë për shkak se në momentin kur u hodh në votim dekreti për Spiropalin, Berisha ndodhej në foltore, duke mbajtur fjalën. Kjo ngriti pikëpyetje se kush e kishte shtypur butonin e votimit në vendin e tij. Në ato momente, pranë vendit ku ulet kreu i PD-së ishte parë vetëm Gazment Bardhi, i cili qëndronte në këmbë në atë zonë të sallës.
Pas publikimit të rezultatit të votimit, reagoi Jozefina Topalli, e cila sqaroi se vota e saj kundër shkarkimit të Spiropalit kishte qenë një gabim.
Sipas saj, në momentin e kaosit në Kuvend, kur opozita kërkonte fjalën, ajo kishte shtypur gabimisht butonat e sistemit elektronik.
“Në momentin e kaosit në Parlament, kur opozitës nuk po i jepej fjala, kam shtypur gabimisht dy butonat në sistem për të marrë fjalën. Kjo ka përkuar rastësisht me momentin e votimit për shkarkimin e një ministri. Bëhet fjalë për një lapsus teknik dhe jo për shprehje të vullnetit tim politik. Sqaroj gjithashtu se në atë moment z. Berisha ishte në foltore dhe nuk ka votuar,” u shpreh Topalli.
Kështu, në fund të një votimi që supozohej të ishte rutinë parlamentare, vëmendjen e mori një episod tjetër: një votë që u dha, u pa në tabelë dhe më pas u shpjegua si gabim.
