Jozefina Topalli pranoi sot në Kuvend se në zgjedhjet e vitit 2021 nuk kandidoi krah Partisë Demokratike dhe në thelb, doli në garë në një pozicion që objektivisht dëmtoi PD-në. Duke iu përgjigjur Taulant Ballës, ish-kryetarja e Kuvendit deklaroi se vendimi i saj erdhi sepse, sipas saj, “mazhoranca kishte kapur Lulzim Bashën”.
Topalli mohoi kategorikisht të jetë takuar ndonjëherë me Ballën, duke e akuzuar atë se ka pasur takime të fshehta me Bashën.
Megjithatë, ajo nuk përmendi një fakt thelbësor: bashkëpunimi politik nuk nënkupton domosdoshmërisht takime personale. Në politikë, efekti i votave është shpesh më i rëndësishëm se takimet dhe deklaratat publike.
Sipas shifrave zyrtare të publikuara nga KQZ në vitin 2021, Lëvizja për Ndryshim e Jozefina Topallit mori në Shkodër 934 vota, ose 2.39%, ndërsa vetë Topalli siguroi 506 vota pëlqyese. Në praktikë, rreth 900 votat që ajo tërhoqi nga elektorati opozitar ndikuan drejtpërdrejt që PSD-ja e Tom Doshit të siguronte mandatin e dytë në këtë qark.
Këto shifra e vendosin deklaratën e sotme të Topallit në një kontekst më të gjerë: pavarësisht retorikës së distancës nga PS, rezultati elektoral i vitit 2021 tregoi se lëvizja e saj pati pasoja konkrete në rikonfigurimin e mandateve në Shkodër, në dëm të PD-së.
