Mazhoranca dhe opozita kanë arritur më në fund konsensus për ngritjen e Komisionit të Reformës Zgjedhore, duke përfshirë në marrëveshje edhe Partinë Socialdemokrate të Tom Doshit.
Pas javësh negociatash, PS dhe PD kanë rënë dakord për një komision me barazi reale, 8 me 8 anëtarë ku për herë të parë do të përfaqësohen edhe partitë e vogla jashtë grupeve parlamentare.
Për të shmangur ngërçin, socialistët kanë pranuar të heqin dorë nga një vend i tyre në favor të PSD-së, duke i lënë Tom Doshit një votë të pavarur në komision.
Në anën tjetër, opozita ka pranuar të ndajë vendet e saj mes forcave që e përbëjnë: 5 për PD-në, 1 për PR-në, 1 për PL-në dhe 1 për Agron Shehajn.
Komisioni, që do të ketë dy bashkëkryetarë me të drejtë vetoje, pritet të miratohet në seancën parlamentare të 30 tetorit, duke i hapur rrugë një procesi që pritet të përcaktojë rregullat e reja të garës elektorale.
