Sekretari i Përgjithshëm i PD, Flamur Noka, u vendos sot në qendër të debatit në mbledhjen e Kryesisë së kësaj partie, ku u diskutua edhe dështimi spektakolar i opozitës për zgjedhjen e Avokatit të Popullit. Ai u justifikua duke thënë se vetë ka firmosur vetëm për dy kandidatë: Besim Ndregjonin dhe Adriana Kalanë.
Por e vërteta qëndron ndryshe. Zoti Noka, në fakt, ka firmosur për të paktën 6 kandidatë për Avokatin e Popullit. Mes tyre janë edhe emrat e Jola Hysajt, Skënder Halucit, Aranita Brahaj dhe Samir Vishajt.
Kaq qesharake janë bërë me justifikime deputetët firmëtarë të PD-së, sa tani gjejnë çdo mënyrë për të mbuluar gjellën e prishur që gatuan për të zgjedhur Avokatin e Popullit me firma të sajuara dhe të mbledhura me nxitim të pajustifikuar, në një proces që kërkonte së paku pjekuri dhe negociata.
Tashmë, gjëja e vetme që u ka mbetur është t’ia ngecin topin njëri-tjetrit ose të kërkojnë falje publike, a thua se kanë shkelur ndonjë duke ecur në rrugë e jo kanë firmosur me vetëdije të plotë kandidatura që do të votoheshin në Parlament.
