Këshilli për Rregulloren, Mandatet dhe Imunitetin do të mblidhet të premten për të shqyrtuar kërkesën e Prokurorisë së Posaçme kundër Korrupsionit dhe Krimit të Organizuar (SPAK) lidhur me heqjen e imunitetit dhe autorizimin për arrestimin e zëvendëskryeministres dhe ministres Belinda Balluku.
Kërkesa e SPAK është paraqitur në kuadër të procedimit penal nr. 136 të vitit 2025 dhe mbështetet në nenet 73, 95 dhe 103 të Kushtetutës, nenin 288 të Kodit të Procedurës Penale, si dhe nenet 13 dhe 118 të Rregullores së Kuvendit.
Komisioni përbën hallkën e detyrueshme procedurale përpara se çështja të kalojë për shqyrtim dhe vendimmarrje në Kuvendin e Shqipërisë.
Belinda Balluku, deputete, ministre dhe zëvendëskryeministre, është marrë e pandehur nga SPAK për veprën penale “shkelja e barazisë së pjesëmarrësve në tendera apo ankande publike”, e kryer në bashkëpunim, sipas neneve 258/2 dhe 25 të Kodit Penal. Akuza lidhet me procedurën e prokurimit për ndërtimin e tunelit të Llogarasë.
