Kreu i grupit parlamentar të Partisë Socialiste, Taulant Balla, komentoi zgjedhjen e Avokatit të Popullit, Endri Shabani, duke e cilësuar si emrin më të mirë të zgjedhur ndonjëherë për këtë post. Ai theksoi se Shabani ishte kandidaturë e propozuar nga opozita, e cila gjeti konsensus edhe te mazhoranca, që e votoi me shumicë votash.
“Ky është rasti më i mirë i zgjidhjes ndonjëherë i Avokatit të Popullit. Erdhën 6 kandidatura nga opozita, hynë të 6-ta në votim, dhe u vendos një prej tyre. Unë kam thënë se Avokati i Popullit s’do të jetë politik. Ne votuam kandidatin që solli opozita,” – tha Balla.
Duke komentuar deklaratat e kryetarit të PD-së, Sali Berisha, i cili paralajmëroi se opozita nuk do të bashkëpunonte më me PS pas zgjedhjes pa dakordësi të Avokatit të Popullit, Balla theksoi se mazhoranca nuk mund të shantazhohet. Ai shtoi se emocionet e opozitës do të ulen “pasi të kenë ngrënë bakllavanë dhe gjelin e detit”.
Balla gjithashtu paralajmëroi ndryshime në komisionet parlamentare nëse opozita nuk rikthen bashkëpunimin:
“Në rast se nuk do ta bëjnë një gjë të tillë, nëse e prishin dakordësinë për të mos marrë pjesë në komision, ne do prishim dakordësinë për prezencën e shumicës në komisione. Do të respektojmë vullnetin e shqiptarëve. Pakica nuk mund të marrë peng nevojën e reformës.”
