Si pjesë e pandarë e PD, anëtarë dhe mbështetës të kësaj partie në Durrës kanë zhvilluar sot një takim të thirrur nga Ervin Salianji, Ilir Alimehmeti dhe drejtues të tjerë lokalë, të bindur se tashmë kjo parti ka nevojë për një mënyrë të re organizimi. Orest Berberi, anëtar i forumit rinor të kësaj partie, e çeli këtë takim duke kërkuar më shumë energji dhe shpresë për ndryshim, në një sallë të mbushur tej e tej dhe entuziaste për një mënyrë të re të funksionimit të saj.
Drejtues lokalë të PD në Durrës folën për domosdoshmërinë e ndryshimit, si dhe rolin që duhet të kenë të rinjtë në këtë proces. Patjetër, theksuan ata, duhet të vijojë beteja me qeverinë, por PD ka nevojë për reformim, ashtu si ka nevojë edhe për kontributin e kryetarit të saj. Së njëjtës natyrë mbetet edhe çështja e listave të mbyllura dhe qasja e PD-së në Komisionin e ri të Reformës Zgjedhore, që ende shihet me skepticizëm dhe si një pazar i ri mes mazhorancës dhe opozitës.
Në takim foli edhe Ilir Alimehmeti, i cili dha mesazhin se PD duhet të qëndrojë e bashkuar drejt rrugës së reformimit të saj. Ndërsa Ervin Salianji theksoi se një tjetër shkak është paaftësia e opozitës, e PD-së, për të qenë bindëse, për të nxjerrë shqiptarët drejt kutive të votimit, për t’i fituar zgjedhjet.
“Zgjedhjet e pjesshme lokale janë një sinjal i fortë që duhet ta lexojë secili prej nesh. Edi Rama arriti të nxirrte, me gjithë represionin, 15 mijë votues në Vlorë, por ne nuk arritëm të nxirrnim dot më shumë apo rreth 2500. E njëjta gjë në Berat, e njëjta gjë në Cërrik, e njëjta gjë në Tepelenë. Kjo më bëri të reflektoj dhe të kuptoj që ne duhet të dëgjojmë demokratët, se pse demokratët nuk dalin të votojnë,” u shpreh Salianji.
