Deputetja e Partisë Demokratike, Jorida Tabaku, ka komentuar përplasjet e fundit brenda PD-së. Ajo tha se debatet e zhvilluara nëpër salla nuk e ndihmojnë partinë, por theksoi se këto diskutime duhet të zhvillohen brenda strukturave të Partisë Demokratike.
Tabaku shtoi gjithashtu se PD ka nevojë për më shumë sinqeritet dhe për të pranuar problematikat me të cilat po përballet.
“Për ta përmirësuar, për ta bërë PD alternativë qeverisëse, hajde ta bëjmë këtë betejë në PD dhe për PD. Për sa kohë debatet ndodhin brenda forumeve të partisë, unë nuk besoj se ka gjë të keqe”, tha mes të tjerash Tabaku në një intervistë në A2 CNN.
Megjithatë, ndonëse të dielën zonja Tabaku gjeti kohë për të qenë e pranishme në një studio televizive, një ditë më parë ajo nuk mori pjesë në mbledhjen e grupit parlamentar të partisë së saj.
Siç ka ndodhur edhe herë të tjera, në momentet kur debatet brenda PD-së janë të nxehta dhe kërkohet mbajtja e qëndrimeve të qarta pro ose kundër, Tabaku dhe deputetë të tjerë të ngjashëm nxitojnë të flasin në televizione për debatin e brendshëm, por personalisht shmangin marrjen e qëndrimeve në forumet e partisë. Në këto raste, shpesh gjenden justifikime banale për të mos marrë pjesë në mbledhje, siç ndodhi edhe mbrëmjen e kaluar me deputeten Jorida Tabaku.
