Jorida Tabaku i ka shpëtuar nderin Sali Berishës, teksa i ka çuar për vizitë në selinë e Partia Demokratike e Shqipërisë diplomatin gjerman Michael Gahler. Teksa i gjithë delegacioni me disa anëtarë refuzoi ta takonte kryetarin e PD-së, qoftë si pjesë të delegacionit të opozitës në takimin në Kuvend, qoftë edhe në PD, zonja Tabaku nuk është dorëzuar dhe deri në fund ka përdorur njohjen e saj personale për të çuar zotin Gahler në selinë e PD.
Edhe pse ky i fundit nuk ka postuar asgjë për vizitën në selinë e demokratëve, për më tepër asnjë foto me kryetarin Berisha, kjo foto ka mjaftuar që deputetja demokrate të nderohet tashmë si personi që ia del t’i heqë sadopak njollën e “non grata”-s Sali Berishës.
Vetë Berisha kishte tentuar të ishte pjesë e delegacionit të PD-së që u takua sot me delegacionin e Bashkimi Europian, por edhe pse janë përpjekur shumë, deputetët e tij nuk ia kanë mundësuar dot futjen e emrit në delegacion. Kaq e rëndë ishte situata e refuzimit, sa kryetari i Komisionit të Jashtëm të Parlamentit Europian, David McAllister, u shpreh gjatë konferencës për shtyp se nuk do ta takonte kreun e PD-së pasi do të lëvizte direkt në aeroport.
Por “komandarja e shpëtimit”, zonja Tabaku, nuk është tërhequr derisa ia ka dalë që Gahler, pjesë e delegacionit të Jashtëm të Parlamentit Europian që ndodhet në Shqipëri, të hyjë në selinë e PD-së.
