Jorida Tabaku tha sot se Belinda Balluku duhet të japë dorëheqjen. Në një intervistë në News 24, deputetja e Partisë Demokratike theksoi se dorëheqjen duhet ta japë edhe kryeministri Rama, pasi sipas saj Balluku nuk ka vepruar e vetme.
Në fakt, zëri i zonjës Tabaku nuk është i vetëm. Ai i bashkohet korit të PD-së, që vazhdimisht, sa herë ka një skandal qeveritar – që në fakt kohët e fundit janë të shumtë – kërkon dorëheqjen e ministrave dhe të kryeministrit. Por nuk mendojnë ndonjëherë që t’i zëvendësojnë me alternativën e tyre.
Për të mos folur për institucionin e vdekur të dorëheqjen në partinë e tyre që ka 33 vjet uzurpuar nga Sali Berisha. Por ky standart i dyfishtë nuk ndalet këtu. Thjesht në këtë moment për një politikane që ka bërë veç këtë punë që kur ka mbaruar fakultetin lind pyetja:
Pse duhet të japë dorëheqjen Rama dhe Balluku kur në praktikisht përballë kanë PD-në e Sali Berishës? Apo që zonja Tabaku dhe shoqet dhe shokët e saj të partisë, nga karriget dhe nga FB, të marrin pushtetin e plotë? Se copa të tij i kanë përfituar edhe gjatë opozitës.
Nëse nuk e kanë kuptuar këto 13 vite, ndoshta ka ardhur momenti ta kuptojnë se pas çdo skandali, sado i madh dhe i fortë të jetë, asnjë ministër, kryetar bashkie dhe vetë kryeministri nuk kanë ndërmend të japin dorëheqjen. Sidomos nëse i vënë në sedër Sali Berisha dhe shpura e tij, qoftë tribale apo intelektuale.
Nëse janë të zotë, duhet t’ua marrin pushtetin. Me revolucion ose me zgjedhje. Por të paktën mos të gënjejnë veten, se qytetarët nuk i gënjejnë dot më me fabulën e stërlodhur se Edi Rama dhe ministrat e korruptuar duhet të japin dorëheqjen se ua kërkon… PD dhe talentet e saj të kulluar të politikës.
