SPAK po heton të gjitha kompanitë që kanë fituar tendera të rrugëve, të cilat dyshohen se janë paracaktuar nga zv.kryeministrja dhe Ministrja e Infrastrukturës dhe Energjisë, Belinda Balluku. Prokurorët e posaçëm kanë sekuestruar dokumenta në të gjitha kompanitë dhe po verifikojnë të gjithë tenderat, librat e shitblerjeve apo dokumenta të tjera që lidhen me aktivitetin e tyre.
Në sitën e SPAK po kalojnë kompania Nova Construction e Ilir Shfufit, kompania Gjoka e biznesmenit Rrok Gjoka, kompania Alko Impex e Arber Abazit, nipi i ish-deputetit socialist Sadri Abazi, kompania Salillari e Pëllumb Salillarit, kompania Geci e Ramë Gecit, kompania e Paqësor Buzit, si dhe kompania Gener 2 e Bashkim Ulajt etj. Paralelisht SPAK po verifikon pasurinë e Ballukut dhe personave të tjerë. Belinda Balluku akuzohet për abuzime me tendera në vlerë miliona euro. SPAK ka kërkuar leje në Kuvend për të arrestuar Ballukun dhe Këshilli i Mandateve dhe Imuniteteve pritet të mblidhet për ta shqyrtuar këtë kërkesë më 23 shkurt.
