Këshilltarët socialistë të Bashkisë Tiranë u mblodhën pasditen e sotme në selinë e Partisë Socialiste për të diskutuar urdhrin e kryeministrit Rama lidhur me shkarkimin e kryebashkiakut Erion Veliaj. Ata vendosën të paraqesin në mbledhjen e ardhshme të Këshillit Bashkiak, e cila do të mbahet të martën, më 23 shtator, kërkesën për shkarkimin e Veliajt dhe nisjen e procesit për zgjedhje të jashtëzakonshme në kryeqytet.
Si argument për këtë nismë, këshilltarët socialistë do të përdorin mungesën e kryetarit të Bashkisë në detyrë për më shumë se tre muaj, një arsye që i referohet Nenit 62 të Ligjit për Vetqeverisjen Vendore, i cili parashikon shkarkimin për mosparaqitje të pandërprerë në detyrë gjatë kësaj periudhe.
Në mbledhjen e sotme u vendos gjithashtu që kjo iniciativë të niset nga vetë këshilltarët e PS-së, duke mos u bazuar në kërkesën e mëparshme të depozituar nga këshilltarët e opozitës demokratike.
Erion Veliaj ndodhet në paraburgim që prej 10 shkurtit, pasi u arrestua me urdhër të SPAK-ut në kuadër të hetimeve për akuza korrupsioni dhe pastrim parash.
Ndërkaq, kryeministri Rama, gjatë Asamblesë së PS-së më 11 shtator, bëri thirrje për nisjen e procedurave për shkarkimin e Veliajt dhe për organizimin e zgjedhjeve të reja, duke propozuar si kandidate socialiste për Bashkinë Tiranë Ogerta Manastirliun.
