Mazhoranca socialiste ka miratuar në Komisionin e Ligjeve rezolutën për Prokurorinë e Posaçme (SPAK), duke i kërkuar këtij institucioni të ndryshojë mënyrën e kërkimit të masave të sigurisë dhe mënyrën e veprimit ndaj personave nën hetim. Dokumenti u miratua vetëm me votat e socialistëve, ndërsa deputetët e opozitës e kundërshtuan ashpër, duke e cilësuar “një ndërhyrje politike” dhe “një tallje me drejtësinë”.
Rezoluta parashikon “unifikimin dhe standardizimin e metodologjisë së hetimit, në lidhje me marrjen e provave dhe kërkesat për masat e sigurisë”, duke iu referuar vendimeve të Gjykatës së Lartë, Gjykatës Kushtetuese dhe Gjykatës Europiane të të Drejtave të Njeriut.
Një pjesë tjetër e saj kërkon rritjen e efikasitetit të Byrosë Kombëtare të Hetimit, përmes plotësimit të vakancave dhe sigurimit të logjistikës së nevojshme për funksionimin e plotë të saj. Dokumenti parashikon gjithashtu ngritjen e një grupi pune me Prokurorinë e Përgjithshme, SHISH dhe agjenci të tjera ligjzbatuese për të analizuar grupet e krimit të organizuar dhe për të përgatitur strategjinë e luftës kundër tyre brenda dhe jashtë vendit.
Në lidhje me zgjedhjet e 11 majit, Kuvendi i kërkon SPAK-ut një analizë të plotë të punës së Task Forcës Hetimore, në bashkëpunim me Prokurorinë e Përgjithshme dhe Komisionin Qendror të Zgjedhjeve, për të vlerësuar efektivitetin e masave të marra dhe për të forcuar luftën kundër krimeve zgjedhore në proceset e ardhshme.
