Lëvizja “Shqipëria Bëhet” u largua me forcë nga sheshi para Kryeministrisë, ku prej një jave po protestonte duke kërkuar dorëheqjen e qeverisë “Rama” pas skandalit të tenderit të tunelit të Llogarasë, ku zv/kryeministrja Belinda Balluku është marrë e pandehur nga SPAK dhe është pezulluar nga detyra me masë sigurie nga GJKKO-ja.
Pas ndërhyrjes së Policisë dhe vendosjes së gardhit të sigurisë, protestuesit e drejtuar nga Adriatik Lapaj u zhvendosën disa metra më tej, pranë Kryesisë së Kuvendit, ku vijuan qëndrimin duke ndezur furnela për ngrohje.
Gjatë spostimit pati edhe përplasje me efektivët, si dhe pretendime për lëndimin e një protestuesi. Lapaj ironizoi veprimin e Policisë, duke e cilësuar si mohim të së drejtës së protestës.
