Kryetari i PD, Sali Berisha, ka kthyer sulmet ndaj Sorosit në aksionin kryesor politik. Edhe në konferencën e sotme për mediat, kryedemokrati i bëri thirrje FBI-së që të hetojë Sorosin.
“I bëj thirrje FBI-së të hetojë udhëtimet me charter të Edi Ramës dhe të Alex Soros, për të kuptuar gjithë dimensionin e veprimtarisë kriminale të këtyre dy delikuentëve ndërkombëtarë,” u shpreh ai.
Berisha komentoi edhe vendimin e mazhorancës për t’i hequr opozitës komisionin parlamentar të integrimit, duke theksuar se është një vendim i Ramës. Megjithatë, ai theksoi se opozita do të bëjë transparencë për shqiptarët, duke konfirmuar kështu prezencën e saj në parlament, pavarësisht se zgjedhjet i quan farsë elektorale.
“Tani me vetëkuptim, si anëtar i organizatës kriminale sorosiane, është i aftë të marrë çdo vendim në verbëri. Ju garantoj ju se opozita do qëndrojë fuqishëm me dritën e transparencës. Pavarësisht nga përpjekjet e tij të dështuara, opozita do t’u japë transparencën shqiptarëve,” tha më tej Berisha.
Mbetet për t’u parë se sa transparencë do të bëjë opozita, pasi duhet thënë që kreu i PD ende nuk ka bërë transparencë me kontratën që pati me La Civita, pasi edhe në konferencën e sotme nuk foli për të.
