Agron Shehaj bëri me dije mbrëmjen e sotme se do të mbështesë kandidatin Florian Binaj për zgjedhjet e Bashkisë së Tiranës, një ditë pasi deklaroi se nuk do ta mbështeste atë. Në një intervistë në emisionin “Opinion”, Shehaj deklaroi se PD “i ka prerë në besë” pasi, gjatë diskutimeve në tryezë, Partia Mundësia kishte propozuar Ermal Hasimen si kandidat, ndërsa PD vendosi të mbështeste Florian Binajn.
“Ne nuk kemi folur për asnjë emër. Ne kemi folur vetëm për parimin. Kemi bërë një propozim që për fat të mirë është pranuar nga PD. Ne jemi krenar për këtë, se fal propozimit tonë u pa si zgjidhje sepse pati entuziazëm dhe nga propozimi dhe nga emrat. U detyruam të nxjerrim dhe emra dhe përmendëm Ermalin në tavolinë, jemi krenarë për këtë. Fatkeqësisht i gjithë ky proces u mbyll në mënyrë të keqe të mundshme, na prenë në besë. Është herë e parë që ndodhi ky lloj dialogu,” – tha Shehaj.
Megjithatë, ai theksoi se pavarësisht këtij problemi me PD, Partia Mundësia do të mbështesë Florian Binajn në mënyrë të plotë, si të ishte propozuar nga vetë ata, deklaratë kjo që bie ndesh me atë që ai deklaroi një ditë më parë, kur tha se s'do ta mbështeste atë. "
Ne do e mbështesim kandidatin jo politik dhe do të mbështesim Florian Binajn sikur ta kishim propozuar ne. Mbështetja për Binaj është në të gjitha format që ai e shikon të arsyeshme dhe të nevojshme. Ne do e mbështesim si të ishte propozimi ynë,” – shtoi Shehaj.
Ndërkohë Ermal Hasimja, kandidati që Shehaj preferonte, ka njoftuar tërheqjen e tij nga gara, duke deklaruar publikisht mbështetjen për Florian Binajn.
“Sot është e qartë që nuk ka ndonjë kuptim gara për mua. Tashmë që Florian Binaj ka mbështetjen e partive politike, nuk do të ishte me vend që të vazhdoja kandidimin si i pavarur. Natyrisht do të zgjidhet një kandidat, dhe kandidatët e tjerë nuk kanë më çfarë thonë pastaj. Unë e mbështes Binajn me shumë kënaqësi,” – deklaroi Hasimja.
Ai shtoi se mbështetja për Binajn nuk do të jetë thjesht simbolike, por do të përfshijë edhe angazhim aktiv gjatë fushatës elektorale.
