Departamenti i Drejtësisë i Shteteve të Bashkuara ka publikuar dosjen e plotë të hetimeve ndaj Charles McGonigal.
Në dosjen e ish-zyrtarit të lartë të FBI-së flitet ndër të tjera edhe për takimet me kryeministrin e vendit Edi Rama.
Një moment Interesant në dosje lidhet dhe me Reformën në Drejtësi. Në faqen 7 të dosjes ka një footnote me shënimin si më poshtë: "Në 9 Shtator 2017, McGonigal i dërgoi një foto të vetes dhe Kryeministrit [Edi Rama] një miku personal dhe i shkroi një tjetër miku personal që Kryeministri po reformonte drejtësinë (në Shqipëri) dhe kjo ofronte "plot mundësi".
Në dokumentin zyrtar të publikuar nga DASH theksohet se:
“Veprimet e McGonigal, ndërsa shërbente si zyrtar i lartë i FBI-së i ngarkuar me mbikëqyrjen e çështjeve të ndjeshme të kundërzbulimit dhe kriminalitetit, ishin të jashtëzakonshme dhe cenonin vlerat thelbësore të FBI-së: integritetin, përgjegjshmërinë dhe udhëheqjen që priten nga të gjithë punonjësit e saj. Përmes skemës së tij, McGonigal dëmtoi qëllimisht një çështje të rëndësishme penale, shkeli besimin e publikut dhe komprometoi integritetin e FBI-së.
Ne e arritëm në përfundimin se McGonigal keqpërdori informacion konfidencial të një çështjeje për përfitim personal dhe për përfitimin e një personi tjetër, duke shkelur rregulloren 5 C.F.R. § 2635.703.", thuhet në dosje.
McGonigal përballet me dy çështje penale, një në Nju Jork dhe një tjetër në Uashington D.C.
Në rastin e parë, ai akuzohet për ndihmën që i ka ofruar oligarkut rus Oleg Deripaska, i cili ndodhet nën sanksione të vendosura nga qeveria amerikane, me qëllim që emri i tij të hiqej nga lista e të sanksionuarve.
Në akuzën e dytë, e ngritur në D.C., McGonigal dyshohet se ka përfituar të paktën 225 mijë dollarë dhe udhëtime të mbuluara nga dy shqiptarë. Sipas dosjes, njëri prej tyre përmendet si "Personi A", një shtetas shqiptar i natyralizuar amerikan që jeton në Nju Xhersi dhe që ka qenë më herët i punësuar në shërbimet sekrete shqiptare.
Ky person, sipas prokurorëve, i ka dhënë paratë McGonigal-it për të nxitur hapjen e një hetimi në SHBA kundër një lobuesi që kishte mbështetur “një parti të ndryshme nga ajo e kryeministrit shqiptar”.
Ndër shkeljet e rënda që i atribuohen ish-agjentit të FBI-së është edhe mosdeklarimi i përfitimeve monetare dhe udhëtimeve të paguara, si dhe takimeve me zyrtarë të huaj – përfshirë kryeministrin e Shqipërisë – çka përbën një shkelje të qartë të rregullave të brendshme të FBI-së dhe ligjeve federale.
