Seanca e sotme plenare nisi me përplasje mes deputetëve të PD dhe kreut të grupit parlamentar të PS, Taulant Balla, pas kërkesës së opozitës për zhvillimin e menjëhershëm të mocionit me debat mbi raportin e DASH për klimën e investimeve në Shqipëri. Balla propozoi datën 14 maj për debatin, propozim që u miratua me votat e shumicës, mes kundërshtimeve të opozitës.
Balla akuzoi deputetët e PD se janë “dashnorët e rinj të integrimit”, duke theksuar se prej shtatorit nuk kanë votuar asnjë ligj që lidhet me procesin e anëtarësimit në BE. Në përgjigje, Gazment Bardhi deklaroi se opozita nuk është vënë në dijeni të këtyre ligjeve dhe se miratimi i datës së mocionit është në shkelje të rregullores. Edhe Jorida Tabaku kundërshtoi, duke thënë se pengesë për integrimin nuk është opozita, por vota e PS kundër heqjes së imunitetit të Belinda Ballukut.
Sali Berisha akuzoi qeverinë dhe kryeministrin Edi Rama se “përdorin parlamentin” dhe se Kuvendi po mbron “vjedhjet e kabinetit qeveritar”. Ai u ndal te çështja Balluku, duke e cilësuar mosheqjen e imunitetit të saj si “shkelje të rëndë të Kushtetutës”.
Ndërkohë, interpelanca me ministrin e Bujqësisë Andis Salla, e kërkuar nga Erion Braçe, pritet të zhvillohet gjatë seancës, në kushtet kur blegtorët po protestojnë për mungesën e subvencioneve. Braçe u pa të hynte në Kuvend me një qese perimesh, si simbolikë e problematikave në sektor.
