Prezenca e zv/kryeministres Belinda Balluku u bë shkak që opozita të braktiste sot seancën e parë të sesionit të ri parlamentar. Pas intonimit të himnit kombëtar, Sali Berisha dhe Gazment Bardhi u drejtuan drejt foltores, duke kërkuar që Balluku t’i dorëzohet drejtësisë, ndërsa bllokuan zhvillimin normal të seancës.
Kryetari i Kuvendit, Niko Peleshi, u përpoq të vendoste rregull, por në pamundësi për të kontrolluar situatën, nenet u miratuan mes kaosit, pa qenë e qartë se për çfarë u diskutua apo çfarë u votua realisht.
Seanca e sotme riktheu edhe një herë skenat e vitit të kaluar, ku përplasjet mes mazhorancës dhe opozitës penguan funksionimin normal të Kuvendit. Ndërkohë, kreu i grupit parlamentar të PS, Taulant Balla, paralajmëroi se, me ose pa opozitën, socialistët do të vijojnë reformat, duke iu referuar reformës territoriale dhe asaj elektorale.
Seanca zgjati vetëm 30 minuta, duke dhënë një prognozë aspak optimiste për sesionin e ri parlamentar.
