Deputetja socialiste Sara Mila duket se ka gjetur formulën më të thjeshtë për integrimin e Shqipërisë në Bashkimin Europian: opozita të mos flasë keq për negociatat. Sipas saj, lajmet për bllokim të procesit janë “fake news”, ndërsa problemi i vetëm real duket të jetë fakti që opozita flet për to në Bruksel dhe në kancelaritë europiane.
Në emisionin “Off the Record” në A2CNN, Mila u përpoq të qetësonte çdo shqetësim duke deklaruar se nuk ka asnjë sinjal për bllokim të negociatave dhe se kapitujt e fundit pritet të mbyllen deri në fund të vitit. Në të njëjtën kohë, ajo akuzoi Partinë Demokratike se po dëmton imazhin e Shqipërisë dhe procesin e Reformës në Drejtësi përmes deklaratave të saj në arenën ndërkombëtare.
Sipas saj, retorika e opozitës krijon dyshime tek vendet anëtare dhe mund të ngadalësojë procesin. Pra, në interpretimin e deputetes socialiste, problemi i integrimit nuk qëndron tek reformat, standardet apo performanca e institucioneve, por tek fakti që opozita flet për problemet.
Me këtë logjikë, duket se integrimi në BE nuk varet më nga korrupsioni, nga sundimi i ligjit apo nga funksionimi i institucioneve, por nga niveli i heshtjes së opozitës. Sa më pak të flasë ajo për problemet, aq më shpejt do të hapen dyert e Brukselit.
Vetëm se në këtë recetë të re për integrimin, Mila nuk arrin të shpjegojë një detaj të vogël: pse Mali i Zi, ku opozita flet po aq lirshëm sa në çdo demokraci europiane, ka ecur disa hapa përpara Shqipërisë në procesin e negociatave.
Nëse formula do të ishte vërtet kaq e thjeshtë, atëherë ndoshta Bashkimi Europian nuk do të kishte nevojë për kapituj negociues, raporte progresi dhe standarde të detajuara. Do të mjaftonte një rekomandim i vetëm: opozita të mos flasë keq për qeverinë.
Por deri atëherë, duket se integrimi europian vazhdon të mbetet pak më kompleks sesa receta që ofron Sara Mila.
