Ish-deputeti i Partisë Demokratike, Ervin Salianji, u ka bërë thirrje qytetarëve që t’i bashkohen protestës kombëtare të thirrur nga Partia Demokratike pasditen e së martës, 10 shkurt, para Kryeministrisë, kundër qeverisë së Edi Ramës.
Përmes një mesazhi publik dhe një videoje shoqëruese, Salianji e vendos protestën në kontekstin e një cikli të gjatë opozitar që, sipas tij, duhet të mbyllet me ndryshim politik. Ai rikujton edhe dënimin e tij me një vit burg në dosjen “Babale”, duke e paraqitur atë si pjesë të një përballjeje politike dhe institucionale.
“Kanë qenë 13 vite të vështira opozite, por koha e ndryshimit ka ardhur! Nesër në Bulevardin ‘Dëshmorët e Kombit’ fjala është e demokratëve dhe njerëzve të lirë. Bashkohuni me Partinë Demokratike!”, shkruan Salianji.
Krahas thirrjes, ish-deputeti ka publikuar një video që ndërthur momentet e dënimit të tij me takimet e fundit që ka zhvilluar me strukturat lokale të PD-së, duke sinjalizuar përpjekjen për të mbajtur kontakt të drejtpërdrejtë me bazën demokrate.
Megjithatë, mobilizimi i tij vjen në një klimë tensioni brenda vetë Partisë Demokratike. Salianji ka shprehur kritika të hapura ndaj lidershipit aktual, ndërsa prej muajsh zhvillon takime paralele me strukturat e partisë në rrethe. Nga ana tjetër, kryetari i PD-së e ka cilësuar atë si “të vetëpërjashtuar”, duke thënë se ka kaluar “vijat e kuqe” të partisë.
