Një mesazh i shpërndarë në radhët e anëtarësisë së Partisë Demokratike në Berat e ka cilësuar Ervin Salianjin si të “vetëpërjashtuar” duke e akuzuar se bashkëpunon me segmente të krimit të organizuar.
Mesazhi, që nuk përbën një qëndrim zyrtar të partisë por një komunikim të brendshëm drejtuar anëtarëve të degës lokale, u bën thirrje demokratëve të distancohen nga aktiviteti që Salianji pritet të zhvillojë nesër, duke e përshkruar atë si një takim me “agjendë private” dhe në shërbim të qeverisë së Edi Rama.
“I dashur anëtar i PD Berat… Ervin Salianji, i vetëpërjashtuar nga PD, po përpiqet me ndihmën e segmenteve të pushtetit dhe segmenteve të krimit të organizuar lokal të organizojë një takim me agjendë tërësisht private”, thuhet në mesazhin e shpërndarë në grupet e anëtarësisë.
Ironia e situatës qëndron në faktin se, pa një vendim formal publik, në një mesazh të brendshëm politik Ervin Salianji “shpallet” praktikisht bashkëpunëtor i krimit, ndërsa anëtarëve u kërkohet të bojkotojnë aktivitetin e tij.
Një formulë e ngjashme është përdorur edhe në raste të mëparshme në degë të tjera të PD-së, ku mesazhe të shpërndara në anëtarësi kanë kërkuar distancim nga takimet e organizuara nga Ervin Salianji.
