Ervin Salianji ka sfiduar kryedemokratin Sali Berisha që, nëse është i sigurt për mbështetjen brenda Partisë Demokratike, të përballet me votën e demokratëve në një garë për drejtimin e selisë blu.
I ftuar në emisionin “Puls” në A2CNN, Salianji foli edhe për mundësinë që të përjashtohet nga PD. Ish-deputeti u shpreh se, edhe nëse ndodh një vendim i tillë, ai do të vijojë komunikimin me demokratët dhe nuk ka ndërmend të nisë një përballje ligjore brenda partisë, për të mos i dhënë – sipas tij – avantazh Edi Ramës.
Salianji theksoi se është i gatshëm të hyjë në garë për drejtimin e PD-së, edhe në kushtet aktuale që ai i konsideron të pabarabarta. Sipas tij, sot nuk ka lista të qarta të votuesve në parti, nuk ka kohë të barabartë për kandidatët dhe infrastruktura e partisë, si edhe burimet financiare, përdoren vetëm nga Berisha.
Ai shtoi se nuk e kupton pse Berisha refuzon një garë të hapur nëse është i sigurt për mbështetjen që pretendon se ka brenda partisë. Salianji theksoi gjithashtu se ai ka qenë një nga figurat që ka arritur rezultate të mira elektorale përballë Ramës, ndërsa – sipas tij – shumë të tjerë në PD janë mundur në zgjedhje.
“Nëse je i sigurt që ke mbështetje, dil dhe provoje me votë”, u shpreh Salianji, duke shtuar se është i gatshëm për një garë të tillë edhe pse një nen statutor mund ta pengojë atë.
