Ervin Salianji ka vijuar takimet me strukturat e Partisë Demokratike në Gjirokastër, ku u ndal te nevoja urgjente për ndryshim brenda PD-së dhe në vend.
“Sot shqiptarët kërkojnë ndryshim real që vetëm PD mund ta bëjë. Edi Ramën ne duhet ta mundim dhe mund ta mundim. Por nuk mund të rrimë edhe 7 muaj pas zgjedhjeve për të ngrohur karriget dhe të mos flasim për problemet. Problemi i brendshëm është i pakapërcyer. Për vite kemi qenë parti që reagon, por shpesh duke kujtuar të shkuarën. Vendi ka nevojë për energji të reja dhe njerëz që kanë marrë votëbesimin e qytetarëve”, u shpreh Salianji.
Ai theksoi se një parti nuk mund të fitojë pa pasur moral dhe të vërtetën me vete, duke shtuar se Rama këtë nuk e ka: “Është e vështirë të fitosh nëse nuk ndryshon gjuhën politike të drejtimit. Shqiptarët duan ndryshim real dhe këtë mund ta sjellë vetëm PD.”
Salianji foli edhe për gabimet e përsëritura të PD-së, nga sistemi zgjedhor tek lënia e mandateve, ndarja territoriale dhe mosvlerësimi i njerëzve të votuar nga qytetarët. Kritika hodhi per zgjedhjen e avokatit te popullit.
“PD paska bërë një gabim tjetër sot. Si mundet PD dhe grupi parlamentar të shkojë pa strategji dhe t’i japë Ramës 15 emra që ai të zgjedhë cilin të dojë? Si mundet PD të mos ketë guximin të thotë që kandidatura jonë do të jetë Adriana Kalaja apo Skënder Aluci? Si ka mundësi që PD nuk mban qëndrim të qartë?”, deklaroi ai.
Salianji kërkoi që PD të marrë përgjegjësi, të përcaktojë qartë drejtimet dhe të prezantojë ndryshimin që shqiptarët presin.
