Ish deputeti i PD Ervin Salianji do të ndalë sot foltoren e tij të takimeve në Shkodër, ku ka njoftuar një takim me strukturat dhe mbështetësit në orën 18:00. Por pothuajse paralelisht, kryetari i Partisë Demokratike, Sali Berisha, shpalli një tjetër takim politik në Korçë, po në të njëjtin orar.
Ky përkim nuk shihet si rastësi, në një kohë kur Berisha ka artikuluar publikisht se Salianji është “armik” politik dhe se, sipas tij, është vetëpërjashtuar nga Partia Demokratike. Në deklaratat e fundit, Berisha ka folur për “vija të kuqe” që, sipas tij, Salianji i ka shkelur, duke e vendosur jashtë strukturave dhe vendimmarrjes së PD-së.
Takimet paralele në të njëjtën orë, në qytete të ndryshme, vijnë si një sinjal i qartë i përplasjes së hapur brenda opozitës dhe i përpjekjes për të përcaktuar se kush flet në emër të Partisë Demokratike. Një PD e ndarë, ku konfliktet tashmë nuk fshihen më, por shfaqen hapur edhe në kalendarin politik.
