Ish-deputeti i PD, Ervin Salianji, është shprehur kundër ndryshimeve të statutit të partisë të cilat jajnë propozuar sot në mblehdjen e Kryesisë së PD. Në një reagim në facebook, Salianji shprehet se nuk mund të hapë rrugë për ndryshime të njëanshme në “Kushtetutën e partisë” dhe në statut.
Ai shprehet se neni 46 është i qartë dhe nuk mund të anashkalohet për interesa të momentit.
“Çdo veprim që imiton modelin e Ramës nuk është zgjidhje, por uzurpim”, shprehet Salianji, duke shtuar se çdo përpjekje e tillë do t’i bënte autorët përgjegjës përpara opozitarëve dhe shoqërisë.
Ai gjithashtu kritikon atë që e cilëson si prirje për të uzurpuar rregullat, për të dobësuar degët e partisë dhe për të përjashtuar demokratët, duke theksuar se PD nuk mund të trajtohet si pronë private e disa individëve.
Ish-deputeti demokrat vijoi me kritikat ndaj Berishës për sulmet e fundit ndaj ambasadorit të BE, duke thënë se po ndjekë të njëjtin model sjelljeje që përdor kryeministri Edi Rama në qeverisje.
Salianji thekson se Rama ndodhet nën presion ndërkombëtar për çështje që lidhen me respektimin e ligjit dhe barazinë para tij, ndërsa paralajmëron se opozita nuk duhet të bjerë në të njëjtën “kurth” duke ndryshuar rregullat apo duke sulmuar ndërkombëtarët.
Në përfundim të reagimit të tij, ai shprehet se nëse opozita fillon të sillet si pushteti që denoncon, rrezikon të dëmtojë jo vetëm veten, por edhe besimin e qytetarëve tek alternativa politike.
“Sepse në fund lind pyetja që askush nuk do ta dëgjojë, por që shumë qytetarë tashmë e bëjnë: mos vallë loja është e njëjtë dhe palët janë më afër se sa duken?”, përfundon reagimin e tij ish-deputeti demokrat.
