Ish deputeti i Partisë Demokratike, Ervin Salianji, ka reaguar përmes një postimi në rrjetet sociale pas një takimi të zhvilluar në Himarë, ku ka kritikuar ashpër drejtimin aktual të Partisë Demokratike dhe mënyrën e funksionimit të strukturave të saj.
Sipas Salianjit, Partia Demokratike duhet të përfaqësojë modelin e epërsisë morale përballë qeverisë, por kjo, sipas tij, po cenohet rëndë nga mungesa e demokracisë së brendshme. Ish deputeti akuzon lidershipin aktual për shkatërrimin e garave, emërimin e drejtuesve pa konsultim me anëtarësinë dhe përjashtimin e anëtarëve e drejtuesve lokalë nga proceset vendimmarrëse.
Ai bën me dije se në Himarë ka zhvilluar një takim me sekretarin e degës së PD-së, dy ish-kryetarë të degës, ish-kandidaten për kryetare bashkie dhe përfaqësues të ish-të përndjekurve politikë. Qëllimi i takimit, sipas Salianjit, ishte dëgjimi i shqetësimeve reale të demokratëve lidhur me proceset e fundit në këtë degë, të cilat ai i cilëson si farsë.
“Nëse Edi Rama dhe qeveria e tij kanë shkretuar Shqipërinë përmes keqqeverisjes, është e papranueshme që lidershipi që sot drejton demokratët të shkatërrojë garat dhe të pilotojë kryetarë pa pyetur anëtarësinë”, shprehet Salianji në postimin e tij.
Ai thekson se ajo që po ndodh në Himarë është e papranueshme për çdo demokrat që beson te parimet dhe te vota e lirë, duke nënvizuar se demokratët duhet të dëgjohen dhe të vendosin vetë për partinë e tyre.
“Pa respekt për anëtarësinë nuk ka opozitë morale dhe pa demokraci të brendshme nuk ka besueshmëri përballë qytetarëve”, përfundon Salianji.
