Kreu i Partisë Demokratike, Sali Berisha, ka reaguar pas takimit që Ervin Salianji zhvilloi me më të votuarit e procesit të Primareve, mes të cilëve ishin edhe mjeku Ilir Alimehmeti dhe vetë Salianji. Berisha tha se të gjithë kandidatët i ka takuar ose telefonuar, duke nënvizuar se “askush nuk është i përjashtuar nga partia”.
Sipas tij, problemi më serioz nuk ka qenë përçarja, por angazhimi total për mbrojtjen e votës:
“Kandidatët e Primareve i kam takuar ose telefonuar. Vetë Salianji ka qenë disa herë në këtë zyrë, Alimehmeti edhe më shpesh. Askush nuk është i përjashtuar. Problemi ka qenë mbrojtja e votës. Kam thënë 12 herë se me Edi Ramën nuk ka zgjedhje, por kam bërë zotimin që do e mbroj votën”, u shpreh Berisha.
Berisha paralajmëroi se protesta e nisur para Kryeministrisë nuk do të mbetet më e përqendruar vetëm në Tiranë. Sipas tij, PD ka nisur tashmë analizën e brendshme dhe këtë javë do të startojnë foltoret në qytete të ndryshme të vendit.
“Këtë javë fillojnë foltoret jashtë Tiranës”, deklaroi ai.
Berisha i përgjigjet pyetjeve për dorëheqjen pas humbjes së zgjedhjeve
Në bashkëbisedimin online me qytetarët, një komentues e pyeti drejtpërdrejt nëse do të largohej nga drejtimi i PD pas humbjes së zgjedhjeve. Pyetja shoqërohej me sfidën “Nëse je burrë, përgjigju”.
Berisha tha se dorëheqja është kriter në kushtet e zgjedhjeve normale, por jo kur procesi është “farsë”:
“Humbja e zgjedhjeve është kriteri më i shëndoshë i dorëheqjes. Por kur zgjedhjet janë farsë, një akt i tillë do t’i shërbente diktatorit dhe atyre që shtypin pluralizmin”, u shpreh kreu i PD.
