Kryetari i PD-së, Sali Berisha, ka vetëpërjashtuar edhe dy anëtarët demokratë në Këshillin Bashkiak të Durrësit, Arlind Boshku dhe Dritan Burgija. Në deklaratën e sotme për mediat, Berisha, ndonëse nuk paraqiti asnjë fakt apo dokument që të vërtetonte pretendimet e tij, tha se mungesat në mbledhjet e Këshillit kanë sjellë këtë vendim.
Sipas tij, dy anëtarët demokratë e kanë përdorur pushtetin edhe për interesa personale.
“Në qoftë se ti je në Këshill dhe shkon një herë në gjashtë muaj vetëm për të marrë ato lekë, nuk merr pjesë në mbledhjet e Këshillit për të mbrojtur interesat e qytetarëve, ti tradhton dhe shkelmon ata që të kanë votuar. Në qoftë se je në Këshill dhe përdor pushtetin si këshilltar për të asfaltuar apo për të përfituar favore personale, nuk është kjo arsyeja pse të kanë votuar qytetarët e Durrësit”, tha ai.
Kreu i PD-së i quajti veprimet e tyre në kundërshtim me statutin e partisë, megjithëse vetë është i pari që e ka shkelur statutin duke mos zbatuar nenin që vendosi vetë, sipas të cilit “kryetari që humb zgjedhjet automatikisht shkarkohet dhe nuk ka të drejtë rikandidimi”.
Përtej hipokrizisë së Berishës dhe mungesës së fakteve për deklaratat e tij, dy anëtarët e PD-së në Durrës duket se janë “kurbanët” e radhës për shkak se iu bashkuan takimeve të Ervin Salianjit.
