Deputeti i Partia Demokratike e Shqipërisë, Saimir Korreshi, denoncoi publikisht katër ditë më parë gjendjen e spitalit të Lushnjë, duke ngritur shqetësime për kushtet në të cilat qytetarët marrin shërbime mjekësore.
Sipas tij, godina e urgjencës nuk përmbush standardet minimale të sigurisë as për pacientët dhe as për stafin mjekësor, ndërsa pamjet e publikuara tregojnë ambiente të amortizuara dhe problematike.
Reagimi erdhi nga Ministria e Shëndetësisë dhe Mbrojtjes Sociale, por jo përmes një inspektimi në terren apo një daljeje publike të ministres. Institucioni zgjodhi të sqarojë situatën përmes një postimi në Facebook, duke argumentuar se pamjet e përdorura nga Korreshi i përkisnin godinës nr. 3, aktualisht jashtë përdorimit dhe në pritje të rikonstruksionit.
Në deklaratën e ministrisë thuhej se repartet janë transferuar në ambiente funksionale dhe se situata në bodrume apo hapësira të jashtme ka karakter të përkohshëm, duke shtuar se procesi i tenderimit për rikonstruksionin ka përfunduar dhe pritet leja e ndërtimit.
Megjithatë, deputeti demokrat e sfidoi sërish ministrinë, duke ftuar ministren dhe deputetët socialistë të zonës që të shkojnë personalisht në spital për të parë nga afër gjendjen reale. Deri më tani, nga ana e ministres së Shëndetësisë nuk ka pasur një vizitë publike në spitalin e Lushnjës për të verifikuar situatën në terren.
Ndërkohë, nga vetë spitali i Lushnjës nuk ka pasur asnjë reagim zyrtar ndaj akuzave të ngritura nga opozita.
Ky episod ka rikthyer sërish debatin mbi mënyrën se si institucionet reagojnë ndaj denoncimeve publike: me postime në rrjetet sociale apo me praninë fizike në institucionet ku qytetarët kërkojnë shërbim çdo ditë.
