Këshilli i Lartë Gjyqësor ka emëruar sot 42 magjistratë të rinj, të cilët u betuan në një ceremoni të zhvilluar në ambientet e “Polisit të Lirisë”. Me këtë akt, sistemi gjyqësor shqiptar u pasurua me një brez të ri profesionistësh që pritet të mbartin përgjegjësinë për zbatimin e ligjit dhe për forcimin e besimit të qytetarëve te drejtësia. Sipas vendimit të KLGJ, shpërndarja e magjistratëve të rinj është bërë në 11 gjykata të juridiksionit të përgjithshëm. Numrin më të lartë të emërimeve e kanë marrë Gjykata Administrative e Lushnjës, si edhe gjykatat e shkallës së parë në Elbasan dhe Fier, me nga 7 gjyqtarë secila.
Në këtë ceremoni, ra në sy mungesa e kryetarit të Gjykatës së Lartë, Sokol Sadushi, i cili nuk ishte i pranishëm pasi nuk ishte i ftuar. Përmes një reagimi të shpërndarë me shkrim, Sadushi përcolli urimin e tij për magjistratët e rinj, duke theksuar: “Në këtë ditë të shënuar për karrierën tuaj dhe për sistemin e drejtësisë, ju uroj suksese, përkushtim dhe ndershmëri në misionin që nisni. Edhe pse sot nuk kam qenë i ftuar mes jush, ndjej të njëjtin gëzim e respekt për këtë moment solemn që shënon fillimin e një përgjegjësie të madhe ndaj ligjit dhe qytetarëve. Uroj që në të ardhmen, ngjarje të tilla të rëndësishme të pasqyrojnë gjithmonë pjekurinë, bashkërendimin dhe respektin që i detyrohemi drejtësisë.”
Fakti që kreu i Gjykatës së Lartë dhe njëkohësisht kryetar i Këshillit Drejtues të Shkollës së Magjistraturës nuk u ftua në një ceremoni që lidhet drejtpërdrejt me sistemin që ai përfaqëson, është një tregues i qartë i krizës së bashkëpunimit mes institucioneve të drejtësisë. Kjo mungesë komunikimi institucional, e manifestuar tashmë në disa raste, duket se po thellon përçarjet në nivelet më të larta të sistemit gjyqësor.
Ceremonia e sotme, që duhej të ishte një ditë gëzimi dhe shprese për drejtësinë shqiptare, u kthye në një tjetër dëshmi të mungesës së harmonisë mes institucioneve. Në vend që të simbolizonte unitetin e tyre përkrah brezit të ri të gjyqtarëve, ajo nxori në pah ndarjet e brendshme që po zgjerojnë hendekun mes atyre që duhet të garantojnë drejtësinë në Shqipëri.
