Partia Demokratike është e paqartë në qëndrimet që duhet të mbajë për Reformën Zgjedhore. Bashkëkryetari i Komisionit, Oerd Bylykbashi, në një intervistë për A2CNN, është shprehur se opozita nuk do marrë pjesë në mbledhjet e komisionit, pasi sipas tij, mazhoranca nuk respekton kërkesat e PD duke sjell në vëmendje zgjedhjen e Avokatit të Popullit.
Por edhe pse shprehet se nuk do shkojnë në tryezë, demokratët i kanë gati kërkesat e tyre nëse klima politike ndryshon dhe puna për Reformën Zgjedhore do të rinisë.
“Asnjë nga këto dy reforma nuk mbijeton dot në një sjellje të një parlamenti si kjo që kemi, ku çdo gjë bllokohet dhe çdo gjë refuzohet. Nuk mund të jenë ishuj normaliteti këto dy reforma. Këto dy reforma kanë si parakusht vullnetin e mirë politik, për t’i bërë gjërat mirë dhe jo për t’ia hedhur njërit-tjetrit. Janë gjëra që lënë gjurmë në një kohë të gjatë dhe lenë ose për mirë ose për keq.
Sigurisht që ka nevojë për ndryshime shumë të forta, edhe të karakterit penal për sa i përket fragmentimit të shtetit në zgjedhje dhe penalizimit të partonazhimit, ndoshta për një ngrirje për një periudhë kohe, që administrata të mos marrë pjesë në procese politike në asnjë lloj forme, gjatë dhe pas orarit të punës”, tha Oerd Bylykbashi.
Nënkryetari i PD, duket se ka humbur besimin edhe te ndërkombëtarët që mund të frenojnë Edi Ramën për të mos bërë reformë të njëanshme.
“Nuk prodhojnë dot asnjë lloj garancie, por nuk ndalojnë dot Edi Ramën që të prish konsensusin. Nuk e ndaluan dot në 2020, nuk e ndaluan dot në 2016..”
Komisioni i Posaçëm për Reformën Zgjedhore është mbledhur vetëm njëherë me praninë e opozitës në këtë sesion parlamentar. Palët politike kishin në agjendë edhe miratimin e ligjit për financimin e partive, por largimi i demokratëve nga tryeza ka ngecur punën.
