Komisioni Qendror i Zgjedhjeve i ka hapur rrugë zhvillimit të referendumit “Pro Familjes”, duke vendosur të pajisë grupin nismëtar me formularin tip për mbledhjen e nënshkrimeve të qytetarëve. Ky referendum synon shfuqizimin e ligjit nr. 64, datë 6.11.2025, “Për barazinë gjinore”.
Grupi nismëtar i është drejtuar KQZ-së me kërkesë zyrtare për pajisje me formularin tip, me qëllim nisjen e procedurave për zhvillimin e një referendumi të përgjithshëm për çështje që, sipas tyre, ka rëndësi të veçantë dhe lidhet me mbrojtjen e familjes.
Përfaqësues të Komitetit Nismëtar për Referendumin “Pro Familjes” kanë paraqitur pranë Komisionit Qendror të Zgjedhjeve, më datë 22 dhjetor 2025, kërkesën për nisjen e procedurave për zhvillimin e referendumit, i cili synon shfuqizimin e ligjit “Për barazinë gjinore”.
Në mbledhjen e zhvilluar këtë të hënë, Komisioni Qendror i Zgjedhjeve vendosi të shtyjë vijimin e procesit, duke i lënë kohë grupit nismëtar që të riformulojë dhe saktësojë më qartë pyetjet që do t’u drejtohen qytetarëve në referendum, në përputhje me kërkesat ligjore.
Sipas legjislacionit në fuqi, për zhvillimin e një referendumi të përgjithshëm kërkohen të paktën 50 mijë nënshkrime të zgjedhësve të regjistruar në Regjistrin Kombëtar të Zgjedhësve në momentin e paraqitjes së kërkesës. Ligji parashikon gjithashtu që grupi nismëtar ka në dispozicion 60 ditë për mbledhjen e firmave, nga momenti i pajisjes me formularin përkatës nga KQZ.
