Raportuesi i Përhershëm i Parlamentit Evropian për Shqipërinë, Andreas Schieder, hodhi poshtë narrativën melodramatike të opozitës për situatën politike në vend, duke iu përgjigjur indirekt deklaratave të Sali Berishës dhe debatit për një krizë demokratike.
Schieder theksoi se “demokracia me molotov nuk është e mirë”, duke iu referuar pamjeve dramatike nga protestat e fundit, ndërsa shtoi se realiteti në terren rezulton ndryshe nga ajo që paraqitet publikisht.
“Javën e shkuar pamë foto dramatike në media nga protesta. Erdhëm këtu dhe pamë një panoramë krejt tjetër. Demokracia po funksionon. Ka debate deri në orën 4 të mëngjesit në Kuvend. Kjo është demokraci normale,” u shpreh ai.
Raportuesi i PE bëri thirrje që situata politike të mos melodramatizohet dhe kërkoi që palët të gjejnë “mesin e artë” përmes dialogut politik dhe argumenteve.
Në lidhje me deklaratat e Berishës për AKSHI-n dhe pretendimet për shitje të informacionit të NATO-s tek vende armike, Schieder refuzoi të hyjë në polemikë:
“Nuk e kemi këtë shqetësim. Mos më bëni pyetje për gjithçka që thotë Berisha dhe mos më shtyni të komentoj çdo deklaratë të tij, sepse atëherë do të dilja nga roli im,” tha ai.
