Kryeministri, Edi Rama, përsëriti sërish sot se ka pasur faktorë të jashtëm që duan të pengojnë portin e ri të Durrësit. Por kryeministri refuzoi të bëjë publikë emrat se cilët janë shtetet apo faktorët që bëjnë presion për të penguar këtë projekt të qeverisë.
“E thashë dy herë që tërheqja e kompanisë është argumentuar me krizën dhe ne nuk kemi asnjë të dhënë që të na japë idenë se ku mund të ketë pasur ndonjë presion. Por ama është e sigurt që faktorë të ndryshëm, për arsye interesash të natyrave të ndryshme, dhe i përmenda cilat mund të jenë këto interesa, nuk e mirëpresin ndërtimin e një porti të ri. Kjo është luftë ekonomike, është edhe luftë e brendshme interesash”, tha Rama.
Mos përmendja e emrave nga ana e kryeministrit shton edhe më shumë pikëpyetjet për vërtetësinë e këtyre pretendimeve dhe për projektin në fjalë. Pasi jo vetëm që është një më të rëndësishmit për vendin, por është edhe një nga investimet me peshën më të madhe në buxhet.
