Kryeministri Edi Rama ka folur sot për sfidat dhe përfitimet që sjell anëtarësimi i Shqipërisë në Bashkimin Evropian për sektorin e bujqësisë, duke e cilësuar këtë proces si një kontratë shtetërore shumë komplekse dhe ndër më të vështirat për t’u zbatuar.
“Bujqësia ka dy anë: ka anën e saj të errët dhe anën e saj të ndritur. Ana e errët është ajo që pret këdo që nuk është i përgatitur për atë ditë.”
Sipas tij, ana e errët i pret të gjithë fermerët që nuk janë përgatitur për standardet, kushtet dhe kontrollet e tregut evropian, ndërsa ana e ndritur u përket atyre që janë gati të përballen me këto sfida dhe të përfitojnë nga hapja e tregjeve.
Negociatat me Bashkimin Evropian dhe marrëveshja e anëtarësimit nuk janë fjalë në letër, por janë kontrata shtetërore shumë komplekse. Kontrata për bujqësinë është më e vështira, por edhe më e mirëpritura për ata që janë të përgatitur për t’u përballur me kushtet dhe kontrollet.”
Në një takim pune të organizuar nga Ministria e Bujqësisë, ku u diskutua plani i veprimit dhe nevoja për ndërveprim të aktorëve të sektorit, kryeministri vuri në dukje se bujqësia është një nga sektorët më të vështirë për t’u harmonizuar me Bashkimin Evropian, por njëkohësisht edhe më i rëndësishmi për zhvillimin ekonomik të vendit.
Rama solli në vëmendje edhe mbështetjen shtetërore për fermerët, duke theksuar se një dekadë më parë bujqësia ishte një sektor i braktisur, ndërsa sot numri i fermerëve që përfitojnë mbështetje nga shteti ka arritur në 67 mijë e 500, nga vetëm 5 mijë e 600 më parë. Sipas tij, kjo mbështetje reflektohet drejtpërdrejt në rritjen e qëndrueshmërisë së fermave.
