Në një reagim në rrjetin social “X”, Rama kërkoi që të vihet drejtësi për efektivët e policisë që mbetën të plagosur gjatë protestës, si dhe të ndëshkohen personat që hodhën sende piroteknike ndaj forcave të rendit. Kryeministri i cilësoi këto mjete si “armë me kapacitet vdekjeprurës”.
Në reagimin e tij, Rama akuzoi opozitën për ushtrim dhune, duke theksuar se sipas tij bëhet fjalë për një rast të paprecedentë në botën demokratike. Ai krahasoi situatën me precedentë historikë, duke përmendur edhe regjimin e Robert Mugabes në Zimbabve.
Kreu i qeverisë u shpreh se pret që drejtësia të veprojë pa hezitim ndaj personave përgjegjës për përdorimin e mjeteve piroteknike ndaj policisë.
Sa i përket situatës politike, Rama deklaroi se përplasjet do të zgjidhen në zgjedhjet e vitit të ardhshëm, ndërsa theksoi se qeveria do të vijojë, sipas tij, rrugën drejt integrimit të Shqipërisë në Bashkimin Europian deri në vitin 2030.
" Sa për fatin politik të këtij cikli të ri jashtënxjerrjesh në bulevard, ai do të shkruhet si zakonisht në zgjedhjet e vitit të ardhshëm me një disfatë ende më shembullore se sa të mëparshmet, ndërkohë që ne do të vazhdojmë pa u ndalur rrugën drejt Shqipërisë 2030 në Bashkimin Europian”, shkruan Rama.
