Kryeministri Edi Rama udhëtoi këtë të hënë drejt Brukselit, ku u prit nga Presidenti i Këshillit Europian, Antonio Costa. Zyra e shtypit e kryeministrit shpërndau vetëm pamje nga takimi mes tyre, pa dhënë detaje zyrtare mbi arsyet e vizitës apo temat e diskutuara.
Sipas burimeve diplomatike, takimi mes Ramës dhe Costës ka qenë një darkë informale, por kjo nuk do të thotë se mesazhet e shkëmbyera kanë qenë po aq informale. Në praktikat e diplomacisë europiane, takime të tilla shërbejnë shpesh për të përcjellë qëndrime politike pa nevojën e deklaratave publike apo dokumenteve zyrtare.
Vizita e Ramës në Bruksel vjen në një moment të ndjeshëm politik për Tiranën. Në Shqipëri, zëvendëskryeministrja Belinda Balluku është pezulluar nga detyra pas një vendimi të GJKKO-së, ndërsa SPAK ka kërkuar heqjen e imunitetit të saj parlamentar.
Për këtë çështje pati një reagim të drejtpërdrejtë dhe të pazakontë nga Komisioni Europian dhe Delegacioni i BE-së në Tiranë, të cilët i kërkuan Kuvendit që ta shqyrtojë pa vonesë kërkesën e SPAK-ut. Ky mesazh u interpretua si një sinjal i qartë se Brukseli po ndjek me vëmendje zhvillimet institucionale në Shqipëri.
Në këtë kontekst, takimi i Ramës me Costan shihet si pjesë e komunikimit të drejtpërdrejtë me institucionet europiane, ndërsa kriza politike dhe institucionale në Tiranë mbetet në qendër të vëmendjes.
