Ndërsa shumë shtete të rajonit kanë marrë vendime konkrete për të mbrojtur qytetarët nga rritja e çmimeve të karburanteve, në Shqipëri qeveria vazhdon të marrë masa vetëm me retorikë.
Këtë tregoi edhe takimi i zhvilluar sot i kryeministrit Edi Rama dhe disa përfaqësuesve të qeverisë me furnizuesit kryesor të naftës në vend, i cili përsëriti të njëjtën deklaratë që, pavarësisht rritjes së ndjeshme të çmimeve në tregjet ndërkombëtare, në Shqipëri kjo rritje ka qenë më e përmbajtur.
Në vend që takimi të ishte për të shpallur masat konkrete, kryeministri u mjaftua me paralajmërime për përfaqësuesit e kompanive se, nëse nuk mbajnë marzhin e fitimit të ulët, qeveria do të risjellë Bordin e Transparencës.
“Nuk kemi parë të arsyeshme që të hedhim hapin dhe të kalojmë në bord, pasi nëse dialogu funksionon siç ka funksionuar, qëllimin e kemi që t’u shtrëngojmë juve në punën tuaj. Por duhet të mëremi vesh që kriza në Lindjen e Mesme nuk duhet të projektohet e tëra mbi supet e konsumatorëve. Kjo do të thotë marzhe më të ulta fitimi për ju, por më mirë marzhe më të ulta se sa bordi në kurriz”, tha ai.
Megjithatë, të lësh funksionimin e tregut vetëm në nivel dialogu me kompanitë pa masa konkrete i shërben propagandës së radhës, pasi në realitet nuk ndryshon asgjë në pikat e karburanteve. Paralajmërimi se, nëse abuzojnë me çmimet, do rikthehet Bordi i Transparencës, gjithashtu nuk sjell asnjë lehtësim për qytetarët, pasi funksionimi i tij i mëparshëm ka treguar që ky bord jo vetëm përbëhej edhe nga përfaqësues të kompanive, por çmimet ishin të shtrenjta.
Duke iu përgjigjur kërkesës së Konfindustrias, e cila propozoi që TVSH-ja mbi çmimin e rritur të karburantit të rikthehet tek konsumatorët, Rama tha se do përfitojnë vetëm pensionistët dhe asnjë kategori tjetër.
“Dua të rikujtoj që ka vetëm një kategori që do të marrë më shumë, sa herë që të jepet mundësia, qoftë nga rritja ekonomike mbi parashikimin, qoftë nga të ardhurat e rritura si pasojë e situatave të kësaj natyre, dhe kjo kategori është ajo e pensionistëve. Askush tjetër s’mund të kërkojë nga buxheti i shtetit më shumë se sa i takon, pavarësisht situatave”, tha ai.
Pra, e thënë me fjalë të thjeshta, qeveria nuk e ka ndërmend të ndihmojë qytetarët as kur përfiton më shumë prej tyre për shkak të situatës së krijuar.
Situata do jetë e njëjtë edhe tek taksat e karburanteve, të cilat nuk do të preken për t’i ardhur në ndihmë konsumatorëve. Ndonëse ndodhemi në një moment ku kërkohet ndërhyrje urgjente, për ministren e Ekonomisë, Delina Ibrahimaj, shqetësim është mjedisi, e cila tha se qëllimi kryesor është reduktimi i ndotjes dhe se ata që ndotin më shumë do të vazhdojnë të taksohen më shumë.
