Rrëshqitja e dheut në aksin Librazhd-Prrenjas, që izoloi për 11 ditë juglindjen e vendit, duket se ka dëmtuar rëndë propagandën e qeverisë. Për ta rregulluar paksa imazhin dhe relativizuar problemin, sot u shfaq në vendin e quajtur “Arra e Gurrës” kryeministri Edi Rama. Ai tha se rrëshqitjet janë shkaktuar nga moti dhe jo nga ndërtimet që po kryhen në Korridorin VIII apo gërryerjet në shtratin e lumit.
Kryeministri, që këtë herë kishte lënë helikopterin në Tiranë dhe kishte mbërritur me makinë, foli si inxhinier duke thënë se tollovia që rruga u shemb nga punimet është një manipulim dhe perversitet i madh.
“Tollovia që u shemb rruga nga punimet është një manipulim dhe perversitet i madh, sepse këtu jemi në aksin e vjetër; aksi i ri nuk është ndërtuar ende. Ajo atje është një rrëshqitje e shkaktuar nga faktori gjeologjik i ngarkuar nga shirat”, tha Rama.
Më tej kryeministri qau dhe hallin e tij ku tha se është i detyruar të dëgjojë zhurmat e atyre që shajnë qeverinë për një punë që, sipas tij, “nuk ka dorë njeriu ta shkaktojë nga paaftësia”.
Megjithatë, në analizën e tij metorologo-gjeologjike, Rama nuk dha shpjegim se pse moti shkaktoi rrëshqitje pikërisht tani, kur po kryhen punimet për Korridorin VIII, dhe jo vitet e kaluara kur nuk ka pasur asnjë punim në zonë.
