Pas deklaratave të Sekretares së Brendshme të Mbretërisë së Bashkuar, Shabana Mahmood, e cila përmendi “rreth 700 familje shqiptare” me kërkesa azili të refuzuara që jetojnë ende në strehim të financuar nga shteti britanik, ka ardhur reagimi i Kryeministrit Edi Rama.
Mahmood deklaroi një ditë më parë se “largimi i këtyre familjeve nuk po zbatohet”, pavarësisht bashkëpunimit të shkëlqyer mes dy vendeve për kthimet. Sipas saj, Shqipëria është një partner standardi të artë dhe nënshkruese e Konventës Evropiane për të Drejtat e Njeriut, ndaj procesi i rikthimeve duhet të rifillojë menjëherë.
Rama reagoi me tone të ashpra, duke e cilësuar deklaratën si “zhgënjyese” dhe duke kritikuar faktin që një përfaqësuese e qeverisë laburiste po përdor retorikë të ngjashme me atë të së djathtës ekstreme. Ai tha se veçimi i shqiptarëve është “një ushtrim demagogjik, i pahijshëm dhe i panevojshëm”.
Kryeministri theksoi se, falë marrëveshjes dhe operacioneve të përbashkëta që prej fundit të vitit 2022, mbërritjet e parregullta të shqiptarëve në Britani janë reduktuar pothuajse në zero, duke treguar se bashkëpunimi mes Tiranës dhe Londrës ka funksionuar.
Ai kritikoi gjithashtu edhe kufizimet e reja të vizave dhe lëvizshmërisë që Britania ka vendosur, duke i quajtur ato “relike të epokës Braverman”, të cilat sipas tij dëmtojnë jo vetëm marrëdhëniet, por edhe vetë ekonominë britanike.
Rama nënvizoi se shqiptarët janë kontribuues neto në ekonominë e Mbretërisë së Bashkuar, dhe se përfitimet që marrin nga shteti britanik janë shumë më të ulëta krahasuar me komunitete të tjera emigrantësh. “Vazhdimi i veçimit të tyre nuk është politikë – është demagogji e rrezikshme”, u shpreh ai.
