Lufta e ftohtë brenda llojit në Partinë Socialiste ka zbritur zyrtarisht në sallën e Kuvendit, aty ku heshtja e disave zhurmon më shumë se fjalimet e të tjerëve. Kryeministri Edi Rama ka zgjedhur një "shuplakë" publike dhe elegante për të saposhkarkuarën e tij, Elisa Spiropali, duke e zhveshur nga rëndësia e dikurshme me një fjali të vetme.
I pyetur për mungesën e Spiropalit në seancën e djeshme, ku duhej votuar pro Belinda Ballukut dhe mbrojtjes së saj nga arrestimi, Rama nuk u ndal të bënte as avokatin e as diplomatin.
"Është punë e kryetarit të grupit ta dëgjojë dhe ta kuptojë pse mungoi në seancë," u shprehu Rama, duke e deleguar fatin e të preferuarës së tij tek kryetari i grupit parlamentar, si të ishte një deputete e thjeshtë e listave të fundit.
Mungesa e djeshme e Spiropalit në votim ishte një mesazh. Në korridoret e mazhorancës u kuptua se shkarkimi i saj i rrufeshëm nga Ministria e Jashtme ishte një hakmarrje direkte e Belinda Ballukut. Thuhet se ishte pikërisht "Zonja e Çeliktë" e Infrastrukturës ajo që i kërkoi Ramës kokën e Elisës, dhe kryeministri nuk hezitoi t'ia dorëzonte në pjatë të argjendtë.
Por degjenerimi politik nuk u ndal me shkarkimin. Rama duket se ka vendosur ta "internojë" Spiropalin politikisht. Në vend që ta dërgonte në Komisionin e Jashtëm, ku përvoja e saj si ministre do të kishte sens, ai e përplasi në Komisionin e Çështjeve të Brendshme. Një lëvizje që shihet si një ulje në gradë dhe një mesazh i qartë: Koha jote në dritaren e botës ka mbaruar.
Spiropali nuk ishte e vetmja që "tradhtoi" në momentin e votimit për Ballukun. Edhe Fatmir Xhafaj, një tjetër "ujk i vjetër" që nuk i ha kaq lehtë hiletë e brendshme, mungoi në sallë.
Duket se Spiropali ka vendosur të mbajë qëndrim, duke mos u bërë mburojë për rivalen që i mori postin, por Rama po e trajton këtë rebelim me një ftohtësi cinike. Në oborrin e Ramës, distanca nga "Skënderbeu" deri tek "internimi" në komisione të dorës së dytë, është vetëm një firmë larg.
