Kryeministri Edi Rama vazhdon të japë këshilla për Europën se si duhet të veprojë me politikat e saj. Kësaj radhe, nga Arabia Saudite, ku merr pjesë në një forum global për inovacionin, Rama u fut në rolin e tij të preferuar, lideri që i jep leksione Perëndimit.
Sipas kryeministrit, sot në Perëndim nuk mbizotëron ndjesia e imagjinatës si frymëzim për të bukurën dhe përmirësimin, por inercia e mërzitshme nga marrja si të mirëqenë e asaj që është trashëguar nga e kaluara.
“Ajo që po përjetojmë sot në perëndim, është inercia. Ajo me të cilën ndeshemi në pjesën e Gjirit dhe një pjesë të tjera të botës, është imagjinata. Imagjinata ushqehet nga inovacioni, nga nevoja për t’u ngjitur më lart, për të bërë kapërcime. Imagjinata lidhet me bukurinë”, tha Rama.
Për të treguar se është një lider i ndikuar nga imagjinata, kryeministri solli si shembull kohën kur ishte kryetar bashkie dhe lyeu me bojë fasadat e pallateve.
“Njerëzit më akuzonin kur isha kryetar bashkie dhe lyva me bojë ndërtesat e qytetit, më thonin kjo është fasadë. Çfarë makthi do të ishte nëse njerëzit nuk do të kujdeseshin sesi do të dukeshin”, tha ai.
Ndoshta për panelistët e huaj, fjalët e Ramës mund të tingullojnë se ai po bën “revolucion” në vendin që drejton, dhe jo një kryeministër i një vendi me popullin më të varfër në Europë. Hipokrizia qëndron në faktin se një kryeministër si Rama, që drejton një vend ku madje nuk prodhohet dot minimumi jetik, nuk mund t’u japë leksione të tjerëve për inovacion. Lyerja e pallateve kur ishte kryetar bashkie dhe ngritja e disa kullave me financime të dyshuara kriminale nuk të bën as lider me imagjinatë, dhe aq më pak të japësh leksione atyre që çdo vit ndihmojnë Shqipërinë me fonde për të qëndruar larg varfërisë.
