Sulmin ndaj prokurorëve dhe gjyqtarëve, kryeministri Edi Rama duket se po e bën edhe përmes debatit “bosh” me gazetarët. Si fillim, kryeministri doli blof në përgjigjen e tij ndaj reagimit të “Shoqatës së Prokurorëve”, duke ironizuar këta të fundit se ende nuk janë regjistruar sipas ligjit.
“Paska dalë edhe një shoqatë prokurorësh e re, ende e paregjistruar deri tani sipas ligjit, po brenda afatit për regjistrim, e cila ka deklaruar solidaritet me shoqatat e gjyqtarëve, duke kërkuar ‘që të mos ulen pagat’,” shkuan ndër të tjera Rama.
Por kreu i qeverisë duket se flet pa u informuar, pasi shoqata në fjalë është e regjistruar sipas ligjit dhe këtë e vërteton vendimi i gjykatës, të cilin e kanë publikuar gazetarët në rrjetet sociale.
Megjithatë, zelli dhe nxitimi për të sulmuar sërish prokurorët dhe shoqatën e tyre përmes reagimeve ndaj gazetarëve, ka bërë që Rama të dalë për herë të dytë blof.
Në reagimin e radhës ironik ndaj gazetarëve që nuk u përmend emrat, kryeministri shpjegohet duke thënë se e kishte fjalën që “Shoqata e Prokurorëve” nuk është regjistruar tek tatimet dhe jo se nuk kishte vendim gjykate.
“Një zëdhënës/e vullnetar/e i/e shoqatës së prokurorëve paska thënë se shoqata e re qenkej e regjistruar në gjykatë dhe unë paskesha gënjyer, po në fakt unë nuk shkruajta që s’janë regjistruar në gjykatë. Unë shkruajta, ‘janë ende të paregjistruar, por janë brenda afatit’ – pra s’pata qëllim ta thumboj, po thjesht të ilustroj moshën fare të njomë të shoqatës, ndërkohë që dihet botërisht se regjistrimi i një shoqate nuk mbyllet me gjykatën, po duhet bërë edhe tek tatimet, gjë që ende s’ka ndodhur,” shkruan ndër të tjera Rama.
Edhe këtu, kreu i qeverisë, e thënë me fjalë të thjeshta, ia ka futur kot, pasi nuk ka marrë as mundimin më të vogël të bëjë një kërkim të thjeshtë për t'u informuar. Në dokumentet publike, shoqata është regjistruar në Qendrën Kombëtare të Biznesit. Dhe regjistrimi në QKB bëhet vetëm pasi shoqatat marrin NIPT-in nga Tatimet, gjë që dokumenti më poshtë e vërteton.
Pra, reagimet e kryeministrit me të pavërtetat që nxjerr, qartazi tregojnë se nuk ka për qëllim të merret me shoqatën në fjalë apo me gazetarët që nxjerrin zbuluar gënjeshtrat e tij. Përmes tyre, ai synon të shtojë disa sulme më shumë në diskursin që ka ndërmarrë për të nxirrë njerëzit e drejtësisë.
