Kryeministri Edi Rama ka bërë të ditur se do të takojë në Hagë ish-presidentin e Kosovës, Hashim Thaçi, i cili prej kohësh mbahet në qeli në kuadër të gjykimit ndaj ish-krerëve të UÇK-së nga Dhomat Speciale.
Në një lidhje live në rrjetet sociale, Rama ka shprehur kritika të forta ndaj drejtësisë ndërkombëtare, duke deklaruar se ajo “ka lënë kokrrën e namit” me standardet që po aplikon në këtë proces. Sipas tij, drejtësia ndërkombëtare po vepron nën çdo vijë të kuqe morale dhe juridike, duke mos reflektuar realitetin e një lufte çlirimtare për liri dhe barazi.
Rama theksoi se e drejta qëndron në anën e një populli që luftoi për lirinë e tij, si dhe në anën e familjarëve të viktimave, grave dhe vajzave të përdhunuara gjatë luftës. Ai u shpreh se e vetmja gjë që bënë luftëtarët ishte mbrojtja e lirisë dhe kërkesa për të jetuar si të barabartë.
“Të reflektojmë mbi standardet e ulëta dhe nivelin shumë nën vijat e kuqe të një drejtësie, kur e vetmja gjë që bënë luftëtarët ishte të mbronin lirinë. Kjo është e vërteta dhe këtë të vërtetë nuk e tund dot askush, e jo më një çekiç absurd i një drejtësie ndërkombëtare që në këtë rast ka lënë kokrrën e namit”, u shpreh Rama.
