Kryeministri Edi Rama u ka bërë thirrje pedagogëve dhe studentëve të universiteteve shqiptare që të angazhohen më fuqishëm në integrimin e komponentit të Inteligjencës Artificiale (AI) në proceset akademike dhe kërkimore. Gjatë një vizite në Universitetin Politeknik të Tiranës, Rama deklaroi se qeveria do ta ketë AI-në në fokus edhe në buxhetin e vitit të ardhshëm, me synim krijimin e laboratorëve dhe infrastrukturës së nevojshme teknologjike.
“Është e domosdoshme të krijojmë hapësira ku pedagogët dhe studentët të aktivizojnë talentet dhe kuriozitetin e tyre intelektual për AI. Përmes inteligjencës artificiale mund të bëhen kapërcime epokale, pavarësisht se në cilën pikë të globit ndodhesh,” u shpreh Rama.
Ai nënvizoi se qeveria do të përgatisë një komponent të posaçëm në buxhetin e ardhshëm për të mbështetur projektet e vlefshme në këtë drejtim, duke ftuar komunitetin akademik të marrë rol aktiv në këtë transformim teknologjik.
Gjatë aktivitetit, Kryeministri ishte i shoqëruar nga ministrja e Infrastrukturës dhe Energjisë, Belinda Balluku, me të cilën u firmos një marrëveshje bashkëpunimi mes kësaj ministrie dhe Universitetit Politeknik.
Marrëveshja parashikon praktika të paguara për studentët, me synim aftësimin profesional dhe përfshirjen e tyre në projektet reale të zhvillimit të infrastrukturës.
